सुदूरपश्चिम रोयल्स र लुम्बिनी लायन्स पहिलोपल्ट नेपाल प्रिमियर लिग (एनपिएल) को उपाधि जित्ने लक्ष्यसहित शनिबार आमनेसामने हुँदै छन्।
सुदूरपश्चिम सुरुदेखि नै दाबेदारको रूपमा हेरिँदै आएको टोली हो। दोस्रो सिजनभर नै साबिकको उपविजेता सुदूरपश्चिमले उत्कृष्ट प्रदर्शन गर्दै आफूलाई प्रमाणित पनि गर्न सफल भयो। लुम्बिनीको उपाधि भिडन्त यात्रा भने उतारचढावका बीच नै रह्यो।
एक समय लुम्बिनी प्लेअफमा नै पुग्दैन कि भन्ने आकलन पनि रहे। किनकि लिगको पहिला चार खेलमध्ये तीन खेलमा हार बेहोरेपछि रोहितकुमार पौडेलको कप्तानी रहेको लुम्बिनी प्लेअफको होडमा कमजोर देखिन्थ्यो। त्यसपछिका अन्तिम तीन खेलमध्ये एउटामा हारले नै लुम्बिनीको प्लेअफ यात्रा सम्भव थिएन तर लुम्बिनीले उत्कृष्ट पुनरागमन गर्यो।
तीनै खेल जित्दै लिगको चौथो स्थानमा रहेर प्लेअफमा स्थान बनायो। प्लेअफका चार टोली (सुदूरपश्चिम, विराटनगर किङ्स र काठमान्डु गोर्खाज ) मध्ये लुम्बिनीलाई नै कमजोर मानिएको थियो।
प्लेअफमा स्थान बनाएपछि लुम्बिनीका कप्तान रोहितलाई पत्रकारले प्लेअफमा सबैभन्दा बलियो टोली कुन लाग्छ भन्दै प्रश्न गरेका थिए। रोहितले जबाफ दिए ‘अहिलेसम्म हेर्दा लुम्बिनी नै राम्रो र सन्तुलित देखेको छु। तीनवटै टोली (सुदूरपश्चिम, विराटनगर किङ्स र काठमान्डु गोर्खाज) बराबर राम्रा नै छन् तर मेरो धारणा लुम्बिनी नै बलियो छ भन्ने हो।’ उनको जबाफमा त्यहाँ उपस्थित हाँसे।
समाचार 
